नांदेड दि. १२ऑग २०२२ :- प्रधानमंत्री सुक्ष्म अन्न प्रक्रिया उद्योग योजना (पीएमएफएमइ) ही केंद्र पुरस्कृत योजना आहे. सन 2020-21 ते 2024-25 या पाच वर्षाच्या कालावधीत एक जिल्हा एक उत्पादन)या आधारावर असंघटीत क्षेत्रातील अन्न प्रक्रिया उद्योगांसाठी राबविली जात आहे. योजनेतर्गत केंद्र व राज्य शासनाच्या खर्चाचे प्रमाण 60 : 40 असे आहे. या योजनेत नांदेड जिल्हयाचा समावेश असुन या योजनेला व्यापक स्वरुप देण्यासाठी 15 ते 31 ऑगस्ट 2022 या कालावधीत कृषि प्रक्रिया जागृती पंधरवाडा साजरा केला जात आहे.
या पंधरवाडयात पुढील प्रमाणे नियोजन करण्यात येणार आहे. 15 ऑगस्ट स्वातंत्र दिनी प्रधान मंत्री सुक्ष्म अन्न प्रक्रिया उद्योग योजनेच्या अंमलबजावणीमध्ये उल्लेखनिय कार्य केलेल्या अधिकारी / कर्मचारी / जिल्हा संसाधन व्यक्ती यांचा प्रशस्तीपत्र देऊन सत्कार करण्यात येईल. सर्व ग्राम सभांमध्ये कृषि सहाय्यक योजनेची प्रचार-प्रसिध्दी करतील. तसेच इच्छुक, पात्र व सक्षम लाभार्थींची आवश्यक कागदपत्रांच्या प्रती घेऊन माहिती जिल्हा संसाधन व्यक्तीकडे सुपूर्द करतील.
16 ते 31 ऑगस्ट 2022 बँकांकडे जे प्रकल्प आराखडे मंजुरीस्तव सादर केले आहेत. त्या बँकांच्या शाखा व्यवस्थापकांची एकदिवसीय कार्यशाळा आयोजीत करण्यात येऊन लाभार्थ्यांच्या कागदपत्रांची बँक अधिकाऱ्यासमक्ष पडताळणी करुन त्रुटींची पुर्तता करुन घेण्यात येईल. जिल्हा संसाधन व्यक्ती सर्व लाभार्थ्यांच्या सविस्तर प्रकल्प आराखडे (डीपीआर) तयार करुन जिल्हा नोडल अधिकाऱ्यामार्फत विहीत कार्यपध्दतीनुसार ऑनलाईन प्रस्ताव बँकेकडे कर्ज मंजुरीसाठी सादर करतील. याबाबत संबंधीत तालुका कृषि अधिकारी व जिल्हा नोडल अधिकारी संनियंत्रण करतील. जिल्हास्तरावर प्रस्ताव प्रलंबीत असणाऱ्या बँक संबंधीत कृषि अधिकारी, जिल्हा संसाधन व्यक्ती, बँक शाखा व्यवस्थापक, जिल्हा अग्रणी बँक व्यवस्थापक यांची एक दिवसीय कार्यशाळा आयोजीत करण्यात येईल व त्याचे संनियंत्रण जिल्हा अधिक्षक कृषि अधिकारी हे जिल्हा नोडल अधिकाऱ्यांच्या मदतीने करतील असे कृषि अधिक्षक कार्यालयाच्यावतीने कळविले आहे.
