पत्रकार व सामाजिक संस्थांनसाठी निवडणूक वार्तांकन पुरस्कार जाहीर
भंडारा दि. ११ जानेवारी २०२३ (आजचा साक्षीदार) – लोकशाहीचा ढाचा अबाधित राखण्यासाठी निवडणूक, मतदान, मतदार नोंदणी या अत्यावश्यक बाबी आहेत. निवडणूका नि:पक्षपाती आणि पारदर्शक वातावरणात पार पाडणे ही निवडणूक कार्यालयाची जबाबदारी आहे. मात्र ही जबाबदारी पार पाडत असताना प्रसारमाध्यमांचे आणि विविध स्वयंसेवी संस्थांचे निवडणूक आयोगाला सहकार्य लाभत असते. हे लक्षात घेवून यंदापासून महाराष्ट्राच्या मुख्य निवडणूक अधिकारी कार्यालयाने पत्रकार आणि सामाजिक संस्थांना पुरस्कार जाहीर केले आहेत, अशी माहिती मुख्य निवडणूक अधिकारी श्रीकांत देशपांडे यांनी दिली.
मतदार नोंदणी, मतदान व निवडणूका यासंबंधी माहितीचे वार्तांकन करणाऱ्या पत्रकारांसाठी निवडणूक वार्तांकन पुरस्कार दिला जाणार आहे. तर मतदार जागृतीसाठी प्रयत्नशील असणाऱ्या स्वयंसेवी संस्थांना ‘मतदार-मित्र पुरस्कार’ दिला जाणार आहे. 10 हजार रूपये रोख आणि मानचिन्ह असे या पुरस्काराचे स्वरूप असेल. हे पुरस्कार 25 जानेवारीला राष्ट्रीय मतदार दिनाच्या कार्यक्रमात वितरित केले जातील. (महाराष्ट्र शासन उपक्रम । महाराष्ट्र शासन योजना । सरकारी योजना )
पत्रकार आणि स्वयंसेवी संस्था या पुरस्कारासाठी स्वत: अर्ज करू शकतात. त्याकरीता मतदार नोंदणी, मतदान, निवडणूका यासंबंधी गेल्या वर्षभरातील आपल्या कार्याची अहवाल स्वरूप माहिती आणि छायाचित्रांसह आपला अर्ज democracybook2022@gmail.com या ई-मेल आयडीवर पाठवाता. अधिक माहितीसाठी प्रणय सलगरकर यांच्याशी 8669058325 या क्रमांकावर संपर्क साधावा, असे उपजिल्हाधिकारी तथा उप जिल्हा निवडणूक अधिकारी महेश पाटील यांनी कळविले आहे.
