पावसाळ्यात आजारांचा धोका वाढला | जिल्ह्यात औषध फवारणी मोहिमेला गती
भंडारा | ९ जुलै २०२५ :मागील आठवड्यापासून सुरू असलेल्या मुसळधार पावसामुळे भंडारा जिल्ह्यातील अनेक नद्यांना पूर आला असून, वैनगंगा नदी आज पहाटे ३ वाजल्यापासून गंभीर पूरस्थितीत वाहत आहे. या पार्श्वभूमीवर संसर्गजन्य आजारांचा धोका मोठ्या प्रमाणात वाढल्याने, जिल्हा आरोग्य विभागाने औषध फवारणी आणि जनजागृती मोहिमेला गती दिली आहे.
❗ संसर्गजन्य आजारांचा संभाव्य प्रादुर्भाव
पावसामुळे ठिकठिकाणी साचलेल्या पाण्यातून मलेरिया, डेंग्यू आणि चिकनगुनिया यांसारख्या साथीच्या आजारांचा फैलाव होण्याची शक्यता वाढली आहे. त्यामुळे डासांची उत्पत्ती होणारी ठिकाणे शोधून नष्ट करण्यासाठी आरोग्य कर्मचारी गावागावात सर्वेक्षण करत असून, प्रतिबंधात्मक उपाययोजना राबवल्या जात आहेत.
🏥 आरोग्य यंत्रणा सज्ज
जिल्हा आरोग्य अधिकारी डॉ. मिलिंद सोमकुवर यांनी सांगितले की,
“प्रत्येक प्राथमिक आरोग्य केंद्रात ताप व साथरोगाच्या रुग्णांवर विशेष लक्ष दिले जात आहे. शाळा, अंगणवाड्या व बाजारपेठांमध्ये जनजागृती मोहीम राबवली जात आहे.“
सर्व रुग्णालयांमध्ये आवश्यक औषधसाठा उपलब्ध करून देण्यात आला असून, वैद्यकीय पथके सतर्क ठेवण्यात आली आहेत. विशेषतः प्रसूतीच्या जवळ असलेल्या गरोदर मातांना तातडीने नजीकच्या आरोग्य संस्थेत दाखल करण्याचे निर्देशही देण्यात आले आहेत.
🙏 नागरिकांसाठी महत्त्वाचे आरोग्यसूत्र
- उकळलेले व सुरक्षित पाणी प्या
- ओलसर कपडे व चिखलापासून बचाव करा
- स्वच्छतेची विशेष काळजी घ्या
- ताप, सर्दी, खोकला, उलटी, जुलाब यांसारखी लक्षणे आढळल्यास त्वरित आरोग्य केंद्राशी संपर्क साधा
🤝 प्रशासनाचे आवाहन
जिल्हा प्रशासन व आरोग्य विभाग यांनी नागरिकांना सहकार्य करण्याचे आवाहन केले आहे. आपले आरोग्य सुरक्षीत ठेवण्यासाठी आरोग्य विभागाच्या सूचनांचे पालन करणे आवश्यक आहे.
सर्व नागरिकांनी सतर्कता बाळगून प्रशासनाशी सहकार्य करावे, हाच उपाय आपली व आपल्या कुटुंबाची आरोग्यरक्षणासाठी सर्वात प्रभावी ठरेल.
