पूर्व विदर्भातील पूरस्थिती नियंत्रणात; नागरिकांसाठी बचावकार्य सुरू
नागपूर | ९ जुलै २०२५ : पूर्व विदर्भात गेल्या काही दिवसांपासून सुरू असलेल्या मुसळधार पावसामुळे निर्माण झालेली पूरस्थिती सध्या नियंत्रणात असून, प्रशासनाकडून नागरिकांच्या सुरक्षेसाठी आवश्यक ती सर्व पावले उचलण्यात आली आहेत, अशी माहिती मुख्यमंत्री देवेंद्र फडणवीस यांनी आज विधानसभेत दिली.
मुख्यमंत्री फडणवीस म्हणाले की, पावसामुळे अडकलेल्या एस.टी. बसमधील प्रवाशांना तत्काळ जवळच्या शाळेत स्थलांतरित करण्यात आले. त्यानंतर सर्व प्रवाशांना सुखरूप घरी पाठवण्यात आले आहे. गडचिरोली ते नागपूर (आरमोरी) मार्ग सध्या बंद असून वाहतूक पर्यायी मार्गाने सुरू ठेवण्यात आली आहे.
गोसीखुर्द धरणातून पाणी सोडण्यात आल्याने गडचिरोली परिसरात सतर्कतेचा इशारा देण्यात आला आहे. नागपूर शहरातील सखल भागांत पाणी साचल्यामुळे बचावकार्य त्वरित सुरू करण्यात आले आहे. या पूरस्थितीत एक व्यक्ती वाहून गेल्याची दुर्दैवी घटना घडल्याची माहितीही मुख्यमंत्री फडणवीस यांनी दिली.
ते पुढे म्हणाले की, पूरपरिस्थिती हाताळण्यासाठी एनडीआरएफ आणि एसडीआरएफ या आपत्कालीन बचाव यंत्रणांना सज्ज ठेवण्यात आले आहे. नागपूर जिल्ह्यासाठी आज ऑरेंज अलर्ट घोषित करण्यात आला असून, प्रशासनाकडून परिस्थितीवर बारकाईने लक्ष ठेवण्यात येत आहे.
मुख्यमंत्र्यांनी नागपूर जिल्ह्यातील नागरिकांना आवश्यक ती दक्षता घेण्याचे आवाहन केले. यावेळी विधानसभेचे सदस्य आ. नाना पटोले यांनी पूरस्थितीवर सभागृहात प्रश्न उपस्थित करत प्रशासनाचे लक्ष वेधले होते.
