नांदेड दि. 29 : खरीप हंगाम 2022 ची पीक पाहणी नोंदविण्याची मोहिम 1 ऑगस्टपासून सुरु झाली आहे. या मोहिमेत 100 टक्के पिकांची नोंदणी ई-पीक पाहणी अप्लीकेशनद्वारे करण्याचे शासनाने निर्देश दिले आहेत. माझी शेती माझा सातबारा मीच नोंदविणार माझा पिक पेरा याप्रमाणे जिल्ह्यातील सर्व शेतकऱ्यांनी वेळेत ई-पीक पाहणी ॲपद्वारे पीक पाहणी करुन घ्यावी, असे आवाहन जिल्हाधिकारी खुशालसिंह परदेशी यांनी केले आहे.
कृषि विभागामार्फत राबविण्यात येणाऱ्या विविध योजना उदा.महाडीबीटी, शासकीय धान्य खरेदी , पीक कर्ज, नैसर्गिक आपत्ती अंतर्गत मदत तसेच इतर काही योजनांचा लाभ मिळविण्यासाठी ई-पीक पाहणी करणे अत्यावश्यक आहे. तसेच प्रधानमंत्री पीक विमा योजनेत विमा घेतलेले पीक व ई-पीक पाहणीमध्ये नोंदविलेले पीक यामध्ये तफावतीचा मुद्दा उद्वभवल्यास ई-पीक पाहणीमध्ये नोंदविलेले पीक अंतिम गृहीत धरण्यात येईल असेही कृषि विभागाच्यावतीने कळविले आहे.
