संगमनेर व अकोले तालुक्यातील 68 ग्रामपंचायती मधील 125 रिक्त जागांसाठी पोटनिवडणूका…
21 डिसेंबर रोजी मतदान
22 डिसेंबर ला निकाल
निधन, राजीनामा, अनर्हता व इतर अन्य कारणांमुळे रिक्त झालेल्या ग्रामपंचायत सदस्य पदासाठी जिल्हयातील पोट निवडणूकांचा कार्यक्रम राज्य निवडणूक आयोगाने जाहीर केला आहे. 21 डिसेंबर 2021 रोजी मतदार घेण्यात येणार आहे. संगमनेर विभागातील संगमनेर व अकोले तालुक्यातील 68 ग्रामपंचायती मधील 125 रिक्त जागांसाठी मतदान होणार आहे. अशी माहिती संगमनेर उपविभागीय अधिकारी शशिकांत मंगरूळे यांनी दिली आहे.
राज्य निवडणूक आयोगाने जाहीर केलेल्या कार्यक्रमानुसार संगमनेर तालुक्यातील आश्वी, बोरबन, खराडी, कोंचिमांथी, कुरकुटवाडी, म्हसवंडी, मिरपूर, निमगांव जाळी, निमगांव टेंभी, पळसखेडे, समनापूर, वडगांव लांडगा, मिर्झापूर, चिंचपूर, काकडवाडी, ओझरखर्द अशा एकूण 16 ग्रामपंचायतमधील 19 सदस्यांच्या जागांसाठी पोटनिवडणूका होणार आहेत.
अकोले तालुक्यातील घोडसरवाडी, इंदोरी, धामणगावपाट, कळंब, लिंगदेव, भोळेवाडी, जायकवाडी, देवगांव, साकीरवाडी, घाटघर, भंडारदरा, जहागीरदरावाडी, शेंडी, बारी, साम्रद, मुतखेल, गुहिरे, शिसवद, कुमशेत, पाचनई,अंबीत, पेंडशेत, शिंगनवाडी, पैठण, वाडी, रेडे, पिंपळगांव नाकविंदा, दिगंबर, आंबेवंगण, शेलविहिरे, जायनावाडी बिताका, एकदरे, लाडगाव, कोकणवाडी, पाचपट्टावाडी, खडकी खु., शिळवंडी, घोटी, कोहने, सोमलवाडी, पेडेवाडी, चंदगीरवाडी, पिंपळदरावाडी, पिंपळगांव निपाणी, ब्राम्हणवाडा, शेरनखेल, चैतन्यपूर, कौठवाडी, मन्याळे, मुराशेत, तीरडे, वीरगाव अशा एकूण 52 ग्रामपंचायतमधील 106 सदस्यांच्या जागांसाठी पोटनिवडणूका होणार आहेत.
या निवडणूकांसाठी 30 नोव्हेंबर ते 6 डिसेंबर 2021 या दिवशी सकाळी 11.00 ते दुपारी 3.00 वेळेत तहसील कार्यालयातून नामनिर्देशनपत्रे प्राप्त होतील व उमेदवारी अर्ज ही दाखल करता येईल. 7 डिसेंबर 2021 रोजी उमेदवारी अर्जांची छाननी करण्यात येणार आहे.
9 डिसेंबर 2021 रोजी दुपारी 3.00 वाजेपर्यंत उमेदवारी अर्ज माघारी घेता येईल. त्याचदिवशी निवडणूक लढविणाऱ्या उमेदवारांना निवडणूक चिन्हाचे वितरण करण्यात येणार आहे. 21 डिसेंबर, मंगळवार रोजी सकाळी 7.30 ते सायंकाळी 5.30 या वेळेत मतदान होणार आहे. 22 डिसेंबर 2021 रोजी मतमोजणी करण्यात येणार आहे. ही संपूर्ण निवडणूक प्रक्रिया पारंपरिक पध्दतीने (OFF LINE) राबविण्यात येणार आहे. अशी माहिती ही श्री.मंगरूळे यांनी दिली आहे.